Bulletjies, julle ongelooflike sterre!
Saterdag 10 Mei 2025 sal onthou word as ’n dag van pure opwinding, pret en passie toe ’n rekordskare van Bulletjie-rugbyspelers saamgedrom het vir niks minder nie as die grootste Bulletjie Rugbyfees in Afrika!
Die Everest Wealth Blou Bulle Bulletjiefes, aangebied deur Midstream Ridge Laerskool in samewerking met die Blou Bulle Laerskole Rugbyvereniging, het hierdie jaar letterlik gebars van energie met 4,394 spelers van 48 skole regoor Gauteng. Op die dag het 426 spanne o/6, o/7 en o/8 spanmaatsjies mekaar op die veld ontmoet in 850 aksiebelaaide wedstryde – ’n ware rugby-reënboog van jong talent en vasberadenheid!
“Wat hierdie jaar se fees só uniek gemaak het,” sê Riaan Langenhoven, voorsitter van die Blou Bulle Laerskole Rugbyvereniging én adjunkhoof sport by Midstream Ridge, “was die sigbare groei in bulletjie rugby. Die gees tussen die spanne, die passie van die jong spelers en hul onblusbare liefde vir die spel was eenvoudig ongelooflik om te beleef.”
Maar dis nie net op die veld waar die pret was nie – die fees was ’n ware gesinsavontuur! Kinders het hulself gate uit geniet op springkastele, en oud en jonk het gestaan in bewondering vir die legendariese trofeë wat ten toon gestel is – die Super Rugby Unlocked-trofee van 2020 en die Super 14 Rugby-trofee van 2010. Wie weet – dalk het een van ons bulletjies, terwyl hy vir ’n foto glimlag, reeds die hart van ’n toekomstige Springbok geklop!
“Hierdie dag sou nie moontlik gewees het sonder ons ongelooflike borge nie,” sluit Langenhoven af. “’n Reuseskuld van dank aan Everest Wealth, Midstream Spar, Chery (Auto investments), Main Events, Dairymaid, Quellé Crisis on Call en elke ander borg wat gehelp het om hierdie geskiedkundige dag waar te maak. Julle het werklik ’n verskil gemaak in die lewe van elke een van die 4,381 bulletjies wat deel was van hierdie onvergeetlike dag!”
